Husbondens hjørne

Her om dagen vart eg verva som medlem på facebook av ein kollega. Der som folk legg ut bilete av seg sjølv og skriv om kva dei liker å gjera. Ein kan melde seg inn i alle mulige slag av klubbar og foreningar. Ein finn nye vener kvar dag og tek opp kontakt med dei ein eingong kjende. Ein kan til og med verta ven med somme ein bare veit korleis ser ut, eller deltek i same foreninga med.
Eit verdomspennande nettverk! Og no hadde eg vorte med! No var eg i gang!
Medan me åt middag nemde eg for fru Vatland at no hadde mannen hennar beint ut kome på facebook. Reaksjonen vart ikkje det eg hadde forventa. "Facebook er visst på veg ut,"sa ho."No er det blogging som gjeld."
Eg sat att desillusjonert. Eg tenkte på det mor mi pleier sei; Når ei ny mote kjem til Barstad, så er det ikkje mote meir.
For dei som ikkje er lokalkjende i Dalane-regionen så kan eg nemna at Barstad blir å rekna som ein utkant i Sokndal kommune som eigentleg óg kan seiast å vera ein utkant.Me som kjem ifrå bygda er vel kanskje ikkje av dei som er mest mottakelege for nye ting. Me snur hovudet ein annan veg og strir imot dette nye, framande, ukjende. Me har då alltid greidd oss utan! Heilt til me ein dag tenkjer: "kvifor ikkje?"
Men då er det altså av og til i seinaste laget..